Национальный архив Республики Саха (Якутия)

Государственное казенное учреждение Республики Саха (Якутия)

Киһи доруобайдык, ыалдьыбакка–сүппэккэ уонна санаата кэлэн үчүгэйдик үлэлээтэҕинэ  бириэмэ букатын биллибэккэ ааһар эбит. Мин 1976 сыллаахха үлэҕэ киирбит күммүн бу соторутааҕыта курдук ɵйдүүбүн.

Аан бастаан ханнык баҕарар киһи билбэт-кɵрбɵт үлэтигэр мунаарара элбэх буоллаҕа дии. Ити түбэлтэҕэ эн аттыгар үтүɵ санаалаах, амарах сүрэхтээх  дьоннор баалларын аан бастаан билбитим. Оннук дьоннорунан ɵр сылга үлэлээбит, опыттаах, анал үрдүк үɵрэхтээх дьоннорунан Р.Т.Васильева, Т.Г.Богатова, М.М.Степанова буолаллар.

Мин кинилэр билиилэрэ-кɵрүүлэрэ дириҥин, дьоҥҥо сыһыаннаһар культуралара үрдүгүн сɵҕɵр-махтайар этим уонна мэлдьитин кинилэргэ ымсыырар уонна тардыһа сатыыр этим.

Урукку кэмнэргэ биһиги архыыппыт үлэһиттэрэ туох да үлэттэн хаалсыбат этибит. Саас үүнээйи олордуутугар, ону кɵрүүгэ-харайыыга, сайын от үлэтигэр, күһүн хаппыыста, хортуоска хостооһунугар, кыһын  тутуу бɵҕүн ыраастааһыныгар кытта субуотунньуктуурбут.

Бырааһынньыктарга бэйэбит күүспүтүнэн концерт кɵрдɵрɵрбүт. Наар күлэ-үɵрэ, ыллыы-туойа сылдьарбыт, тустаах да үлэбитигэр оннук таһаарыылаахтык үлэлиир этибит.

Мин үлэм тас ɵттүгэр сайын аайы уоппускабар кэргэним дойдутугар үүтээҥҥэ олорон сиэннэрбин кытта оттуубун, сир астыыбын, айылҕалыын алтыһан, дуоһуйа сынньанан, күүс-күдэх ылынан иккис дьиэ оҥостубут тапталлаах архыыппар үɵрэ-кɵтɵ үлэлии-хамсыы кэлэбин.

Мин үɵрүүбүн-хомолтобун бииргэ үллэстэр, миигин ɵйдүүр-ɵйүүр салалтам үлэһиттэрин, дьүɵгэлэрбин уонна табаарыстарбын тапталлаах архыыппыт 100 сааһын туоларынан ис сүрэхпиттэн долгуйан туран эҕэрдэлиибин.

Бэйэм кыра эрдэхпиттэн ыллыырбын сɵбүлүүбүн, иэйиим киирдэҕинэ табаарыстарбын, сиэннэрбин хоһуйан хоһоон суруйабын. Ордук айылҕа, таптал темалара табыллар курдуктар.

Россия бочуоттаах  архивиһа

Анисимова Софья Афанасьевна

*******

Үйэлэр тухары мунньуллан

Хараллан сыталлар дьыалалар,

Үйэлээх саастары туорааннар

Кэпсииллэр норуоппут олоҕун.

Үйэлээх сыллары уҥуордаан

Сурукка-бичиккэ тиһиллэн

Үйэлэр тухары эн дьыалаҥ

Кинигэ, сурунаал буоллуннар.

Сүүһүнэн сылларга ɵрүүтүн

Сахабыт кэскилин уһансан

Дьон-норуот махталын ылаҥҥын

Сайда тур тапталлаах архыыппыт.

10.11.2015 сыл