Бөдөҥ судаарыстыбаннай диэйэтэл Степан Васильев аатын үйэтитиигэ анаммыт экспедиция Ньурба улууһуттан делегацията бэҕэһээ, кулун тутар 28 күнүгэр, Максим Кирович Аммосов төрөөбүт дойдутугар Нам улууһун Хатырыгар тахса сырытта.
Намҥа тахсарга дэлэгээссийэҕэ Национальнай архыыптан Айталина Захарова, СӨ норуотун хаһаайыстыбатын үтүөлээх үлэһитэ, Степан Васильев аймаҕа Эдуард Данилов уонна улуустааҕы үөрэх управлениетын салайааччыта Алевтина Аргунова холбоспуттара. Ньурбалары улуустааҕы депутаттар Сүбэлэрин бэрэссэдээтэлэ Иван Попов, Хатырык нэһилиэгин баһылыга Юрий Дьяконов, музей үлэһиттэрэ, «Махсыым ыччаттара» ыччат түмсүүтэ үөрэ-көтө көрүстэ.
Хатырыкка М.К.Аммосов аатынан СӨ судаарыстыбаннаһын историятын музейыгар тиийээт Максим Аммосов бүүһүгэр сибэкки дьөрбөтүн, гирлянда ууруу сиэрин-туомун ыыттылар, ол кэннэ олус дириҥ ис хоһоонноох экскурсия оҥордулар. Салгыы Саха сирин биллэр судаарыстыбаннай диэйэтэллэригэр анаммыт Төгүрүк остуолу Ньурбаттан Сергей Евсеев уонна Намтан Иван Попов олус хорутуулаахтык тэрийэн ыыттылар.
СӨ култууратын үтүөлээх үлэһитэ, СӨ Национальнай архыыбы Сүбэтин бэрэссэдээтэлэ Айталина Афанасьевна Захарова Национальнай архыып докумуоннарын көрдөрөн мустубут дьону биллэ сэргэхситтэ. Ол курдук, Степан Васильев төрөөбүтүн туһунан туоһу суруга этэринэн, ахсынньы 5 күнүгэр күн сирин көрбүтүн, онтон сурукка сүрэхтэммит күнэ ахсынньы 22 киирэ сылдьарын көрдөрдө. Маны тэҥэ Максим Аммосов, Исидор Барахов, Степан Васильев үөрэххэ туттарсыбыт эксээмэннэрин сыаналара, үөрэххэ киирбит туоһу суруктара кытары сурукка тиһиллэн хаалбытын билиһиннэрдэ.
Эһиил М.К.Аммосов төрөөбүтэ 125 сылыгар намнар эмиэ бу курдук экспедиция тэринэн үтүө өйдөбүл хаалларыахтарын туһунан санаа киирбитин эттилэр. Ньурба ыччата бэртээхэй тэрээһини көҕүлээбиттэрин, үтүө холобур оҥостуохха сөбүн олус биһирээтэ.
Лена ПЕТРОВА
